రామభద్ర రఘువీర రవివంశ తిలక

రామభద్ర రఘువీర రవివంశ తిలక నీ
నామమె కామధేనువు నమో నమో

కౌశల్యానందవర్ధన ఘనదశరధసుత
భాసుర యజ్ఞరక్షక భరతాగ్రజ
రాసికెక్క కోదండ రచన విద్యా గురువ
వాసితో సురలు నిను వడి మెచ్చేరయ్యా

మారీచసుబాహు మర్ధన తాటకాంతక
దారుణవీరశేఖర ధర్మపాలక
కారుణ్య రత్నాకర కాకాసుర వరద
సారెకు వేదవిదులు జయవెట్టేరయ్యా

సీతారమణ రాజశేఖర శిరోమణి
భూతలపుటయోధ్యాపుర నిలయా
యీతల శ్రీవేంకటాద్రి నిరవయిన రాఘవా
ఘాత నీ ప్రతాపమెల్ల కడునిండెనయ్యా

జయ జయ రామ

జయ జయ రామ సమర విజయ రామ
భయహర నిజ భక్త పారీణ రామా

జలధి బంధించిన సౌమిత్రి రామా
సెలవిల్లు విరచిన సీతారామా
అల సుగ్రీవునేలిన అయోధ్య రామా
కలిగి యజ్ఞము కాచె కౌసల్య రామా

అరి రావణాంతక ఆదిత్యకుల రామా
గురు మౌనులను గాచే కోదండరామా
ధర నహల్య పాలిటి దశరధ రామా
హరురాణినుతుల లోకాభి రామా

అతి ప్రతాపముల మాయా మృగాంతక రామా
సుత కుశలవ ప్రియ సుగుణ రామా
వితత మహిమల శ్రీవేంకటాద్రి రామా
మతిలోన బాయని మనువంస రామా

రాముడు రాఘవుడు రవికులుడితడు

Get this widget | Track details | eSnips Social DNA

రాముడు రాఘవుడు రవికులుడితడు
భూమిజకు పతియైన పురుష నిధానము

అరయపుత్రకామేష్టియందుపరమాన్నమున
పరగ జనించిన పరబ్రహ్మము
సురల రక్షింపగ అసురుల శిక్షింపగ
తిరమై ఉదయించిన దివ్యతేజము

చింతించే యోగీంద్రుల చిత్త సరోజములలో
సంతతము నిలిచిన సాకారము
వింతలుగా మునులెల్ల వెదకిన యట్టి
కాంతుల చెన్ను మీరిన కైవల్యపదము

వేద వేదాంతములయందు విజ్ఞాన శాస్త్రములందు
పాద్కొనపలికేటి పరమార్ధము
పోదితో శ్రీవేంకటాద్రి పొంచి విజనగరాన
ఆదికి అనాదియైన అర్చావతారము